الله يعلم هالوضع
كم عيله ظلّت بالألم
لا بعد راتب يجيها
يعينها بحال الإزم
يمكن الغفله خلّتنا
بغيرنا ما نفتكُر
بالغنى ننعم براحه
و ناس يلويها الفگُر
نطلب امن الله السّموحه
ان كان يقبل هالعذُر
لو صرخ مهضوم بينا
وين أصحاب الشّيم
مكيّف الخربان خلّى
العيله من حر تستجير
و صاحب العيله بحظره
مكبّل و مثل الأسير
دمعه يلگاها من طفله
شلون ما گلبه يحير
يشكي للمعبود حاله
و الدّمع منّه انسجم
لازم انفكّر اشويّه
بالذي يعيش الكدَر
ذولا اخوتنا و أهلنا
و لازم انحس بالبشَر
بهالظّرف الاحوال صعبه
شلون عالوادم تِمُر
و الله بالرّحمه يجازي
كلمن ابعطفه رحَم
اتفگّدوا ذيك العوايل
و الذي بيها ضعيف
گدموا المعروف ليهم
و الأجر عند اللّطيف
و البعض ميحوج يسأل
مِن أحد لنّه عفيف
هذا ميدان الشّهامه
و بيه محموده الهِمَم
عنكم الله يزيل بلوه
مِن تعينون الفقير
يكتب الباري أجركم
بالعمل لو هو صغير
الله بكتابه يوصّي
و النّبي الهادي البشير
و الوصي الكرار وصلَت
نخوته الكل الأُمَم
و اليرحم الملهوف و يگضي
حاجته المتعسّره
ينول منّ الله الكرامه
و بالجنان ايبشّره
و من رَسَم بسمه اعلى شِفّه
يلگى خير الآخره
و الشّهر خيرات كلّه
و فاز من بيه اغتنم
خلنا نتعاون و نرفع
كل عِسُر بالعايله
خصوص من كانوا ابضيگه
من مصيبه و نازله
نرفع اهموم و ننشّف
هالدّموع السّايله
و مِن بدل ذيك الكآبه
نشوف كل وجه ابتسَم
أختم ابياتي و صَلِّي
اعلى النّبي خير الأنام
و اذكر الكرار حيدر
لو عطى ضيّگ لِثام
يقبل الباري عملنا
نرتجي بشهر الصّيام
يدفع الأزمه برَحِمته
الواسعه البيها حتَم .
