تجفس الرّكبه يم ولدها اتذاكر اوياه
وان كان يگبّض يفتهم تشعر ابراحه
وان كان عگله بالمذاكر صار مشخال
تمگّع شعرها من القهر تنصب مناحه
و اتعيش أزمه ما مثلها اتصير أزمات
منها النّفس تتعب ولا تظهر ملاحه
كانت إذا اتكيسل تضربه بطبگة انعال
تبذل جهدها ليمن اتعاين نجاحه
تنذر عليه ليمن نجح مصرع العباس
واللي بمصابه حسين متكسّر جناحه
تدعي الباري و تنتخي بحيدر ابو حسين
يمسح عليه و يهتدي منّه بصلاحه
دايم اتحَشمه و بالهدايا تعطي اوعود
بس ينجح و منها الگلب يلگى انشراحه
بتهديه سيكل لو بعد تاخذ له ايباد
و جوّال بيه العاب بتزيد ارتياحه
و اتوصّي الأستاذ ياخذ باله اعليه
تگلّه اوليدي يريد تشجيع بصراحه
و اتوصّي المرشد تگلّه اوليدي يحتاج
منكم عنايه دايمه بجيته و رواحه
عفيه عليها صابره و اتربّي أجيال
سهراته طول الليل لو گرّب صباحه
تفرح إذا جاها الولد ناجح و مسرور
و اتكلّلت الاتعاب بالنجح و فلاحه
كل هذا لجلك سوّته أمّك يمعزوز
ليك ابگلبها لو دريت اكبر مساحه
واصلِت مشوار العلم واصبحِت أستاد
لو أصبحت دكتور متخصّص جراحه
بالك بعد تنسى فضل أمّك يبو فلان
إن كِنِت من أهل الدّيانه و الرَّجاحه
لو لفلفِت بالكون كلّه تريد عنوان
للرّحمه ما تلگى مثلها و بالسّماحه
أمّك أساس الخير و النعمه والاحسان
جنّتك هذي لو ردت بالجنّه واحه
أوصاك بيها خالگ الدّنيا والاكوان
لو ضيّعتها ما أظن بتلاگي راحه
