اِحمَدِ الباري لا نِمِت مرتاح بالك
لا دَينَك اتحاتي ولا سگمة اعيالك
اِحمَدِ الباري اعلى الوظيفه ورغدة العيش
وشوفة اولادك تنعم بوافر دلالك
اِحمَدِ الباري انت حُر و تمشي ادروب
ما ضمّك سجن لو تسحب اغلالك
اِحمَدِ الباري اعلى العگل ما صِرِت مجنون
المو زين يسخر بك اذا عاين افعالك
اِحمَدِ الباري بكامل الخلقه ترى انشاك
من دون عاهه ولا نگص وابدع جمالك
اِحمَدِ الباري ما صِرِت أبكم بلا السان
لَمَن تحچي الخلگ تفهم مقالك
اِحمَدِ الباري لك أذن تسمع الأصوات
تفهم على اليحچون ما تگطع وصالك
اِحمَدِ الباري انطاك عين و لنّك اتشوف
جمال بكل كتر متّع خيالك
اِحمَدِ الباري ما صِرِت معلول مطروح
و اللي يزورك ينكسر گلبه لحالك
اِحمَدِ الباري سلّمَك من مرض مخطور
تحسّ المنيّه گرّبت و الموت جا لك
اِحمَدِ الباري ما ابتليت بوجع الاسنان
على الحنك إيدك والألم بالسَّوره هالَك
اِحمَدِ الباري الزوّجك زوجه تداريك
حاجتك تگضيها و تعاينها اگبالك
اِحمَدِ الباري برحمته أعطاك أولاد
ما صِرِت محروم و نسل بالدّنيا ما لك
اِحمَدِ الباري ما إلك غايب و محزون
وسط السِّجن واعليه صبّيت انشغالك
اِحمَدِ الباري ما صِرِت تسكن بإيجار
وأرهى عليك ابّيت سكّنته أطفالك
اِحمَدِ الباري ما ابتليت بجار مو زين
داشر و متعيلف و لا يرحم جهالك
اِحمَدِ الباري عندك اولاد اليبرُّوك
ما منهم اليعصيك و يودّ ارتحالك
اِحمَدِ الباري اتيسَّرت كل بِنِت بزواج
عندك فلا عانس بگت و السَّعد نالك
اِحمَدِ الباري ملتزم باحكام هالدِّين
تأدّي الصّلاه والصّوم و اتزكّي اموالك
اِحمَدِ الباري الخلَّى لك ما بين هالناس
ودّ و محبّه و لا جمع يبغى اعتزالك
اِحمَدِ الباري الوفّگك تصنع المعروف
والبعض دگ بابك لجل طيبة اعمالك
اِحمَدِ الباري سلَّمك من ذيك الاخطار
و لَمَّا استعنته عانك بمحنة عطالك
اِحمَدِ الباري ما انكسرت ابصفگة اموال
و ما شِفت في لحظه بعد رايح حلالك
اِحمَدِ الباري ما صِرِت عالنّاس مغرور
متكبّر أتظن ما أحد حصّل منالك
اِحمَدِ الباري خلَّى لك أصحاب خيرين
لا طِحِت گاموا لك و شدّوا لك احبالك
اِحمَدِ الباري اعلى الأمان و ماجت احروب
تكدّر حياتك والأشد ترگب زوالك
اِحمَدِ الباري و لو حمدته طول الاعمار
متعادل اوجودك و لا شربة زلالك
اِحمَدِ الباري طول عمرك يا عسى تشوف
ربّ العباد برحمته يشكر فِعالك
اِحمَدِ الباري لو تِبِتْ من كل معاصيك
يغفر لك اذنوبك و لا يطوّل جدالك
اِحمَدِ الباري لو مِتت في وسط البلاد
يجهزوك و ما تلگى عدو ينهب ارحالك
اِحمَدِ الباري أهلك و ناسك يشيعوك
لگبرك و لا بسيوف متگطعه اوصالك
اِحمَدِ الباري تنگبر سالم و لا اتشوف
مفصول راسك والعدو على سنان شالك .
