ندوّر أكل ما بيه شبهه گلّي امنين
و يا مطعم اتشوفه عدل ملتزم بالدّين
والله ابتلينا بهالزمن واشلون بلوه
والبعض ما عنده مع الوادم امروّه
يبيع الدّيانه بكم فلس ما بيه نخوه
و حط للدّجاج اعلان ماخذ من المسكين
ياخذ عشر للتغطيه والباگي مجهول
مستورد امفغّص يبيعه بربح مأمول
مِيته يوكّلها الخلگ والغش إله يطول
ذمّته يشغلها بفعل أبداً مهو زين
گالوا الأجانب في البلد تلعب على الكيف
لمّن يخويه اترسملوا منّا خذوا الحيف
معلوم هذا والشواهد بيها توصيف
للحالة المُرّه الدَهت كلّ البلادين
والغش إله أنواع بيّنها بن عاگول
آمر غلام يبيع لحم اچلاب و يجول
و مرعوب ظل ينبح امّنها وصار معلول
والمشهد بدرب الزّلگ عدنا صفى الحين
مو بس يخويه المسأله بالأجنبي أتكون
ودّ البلد گلنا دجاجه ولحمه مضمون
تاليها نسمع بالرّگابه اعليه يطبّون
و يظهر الخافي والذي متستّر اسنين
همّه المربح گال للهبره تعالي
و لسمعته بين الخلگ ما هو امبالي
يمشّي البرازيلي بخفيه و الاسترالي
ولا يدري شنهي العاگبه من فعله الشّين
و السَّمك بايت نفّگه وباعه الأوادم
و الرّيحه منّه طالعه والله العالم
هذي شطاره يحسبنها و موش نادم
و اگحطه ينادي بهالوضع راحوا الطيبين
بعض الخلگ ياخذ و لا عنده بصيره
خلّت طباخ ابيوتها و دارت لغيره
حتى صفينا اليوم في حاله مريره
خلّت بعض هالناس يا وسفه مريضين
أكلة المشبوهه يخويه سودنتنا
سِلبت الغيره و الحميّه من بعضنا
و صرنا بعد منبالي لو طلعت بِنِتنا
للسوگ متبرجه و لا بيها حيا الزين
عيدوا النّظر يخوان في اللي تاكلونه
وامر اللحوم الزوم منكم تعرفونه
و ميضر إذا راعي المطعم تسألونه
هذا دجاجك واللحم خبّرنا من وين
واللي يوكّل هالأوادم لحم مشبوه
لازم بلاغ من الرئاسة يكون يجيبوه
وابخيزرانه امنگّعه بالملح يضربوه
حتى يتوب ولا يغش تالي المسلمين
كل يوم و الثاني توافينا گضيّه
ضبطوا محلّ امخالف و تلفي بليّه
والأغذيه ظلّت بمدّه منتهيّه
و ابّلده وحده جا الخبر غلگوا محلَّين
الله علينا بهالنّعم ما يوم گصّر
و بامر الشريعه لزوم ناخذ و نتفكّر
وأكلة حلال يصير نطلبها من مصدر
والهادي والعتره علينا يصيروا راضين
مطلوب من عدنا الورع بالشبهه نُوگف
الباري يحب عبده لبطنه وفرجه لو عفّ
و المصلحة بيها الشّرع من عدنا أعرف
نلتزم هدي المصطفى وآله الميامين .
