بسوگ الجديده للسّمك صارت قضيّه
و الباعه و التّجار صابتهم بليّه
بأوّل حراج السُّوگ حاله اشلون صعبه
و التّاجر الّلي اهناك جت له اتگول ضربه
اتفاجأ من الّلي صار لنّه انضرب كسبه
و ذيك الزّباين حايره التمّت سَويّه
گالوا على البانه الوحده خمسة اريل
و الكل غدا من هالخبر كنّه متبهدِل
برطومهم لو تنظره اتشوفه متهدّل
و جاهم الحمّادي ابو اخبار الطّريّه
الاسماك ظلّت عالأرض ما حد إليها
و البعض يناشد من يجيب احلول بيها
و لو تِلفَت الأسماك لا تعويض فيها
ذولا اعلى باب الله و حالتهم شجيّه
ماكو زباين تشتري و الحال مدمور
كلمن اضّرر بالقرار و صار مقهور
شيسوّي البايع إذا هو صار مجبور
و البعض منهم راح سوگه الأوليّه
لا تخرب الأسماك و تالي يخسروها
و في المفرش السّابگ ابهمّه صرّفوها
و اخبار عنهم في التّواصل نشّروها
و سوگ الجديده أصبحت گفره و خليّه
كلمن من الباعه انفجر غيظه و تِكَلَّم
و اتحسّه من زود القهر گلبه تِألَّم
و اتكلّمت الاخبار و كلمن صار يعلم
بالحوسه ، و الغوله ترى ما هي خفيّه
عفيه أمين المنطگه واعدهم ابخير
اتجشّم لحَلّ المشكله و يصير تغيير
و الما يلِين ابموقفه يناله التّكسير
لنّ الأمر يحتاج لِين و أريَحيّه
خُفُّوا على الوادم عليكم خفّف الرَّب
معلوم كل بيّاع مِن ينضام يغضب
و لا ضيّگ العيشه عليه واحد اتحنطب
و لا ما گدر للرّد شكى لربّ البريّه
ميريد غير انصاف و هم تقدير للحال
و ايجار مقبول السّعر و يريّح البال
و لا تضغطه بشروط صعبه مثل لجبال
و اتصير اموره اميسّره و حلوه و هنيّه
نتأمّل ايزول الضّجَر و يعمّ لسرور
و الأزمه اتعدّي بسلامه و شرح لصدور
و اتجي الزّباين تشتري الكنعد و هامور
و يسترزگ البايع و بسماته جليّه
يا رحمة الله دنزلي و بالسُّوگ حضري
و خلّي الأمور اميّسره و للدّوم تجري
مثل العروسه امدفتره زيّنها شِعري
و الأزيَن اتصلُّوا على العتره الزّچيّه .
