خلّك ابّيتك وانثبر
يا صاحبي و ابلا زعل
مو عيب لمّن تنحجر
بالبيت و ابگرب الأهل
استنفار صاير بالبلد
ما هو طبيعي و تنظره
منّه الدراسه اتعلّگت
و الطّرگ كلها امسكّره
و حظروا التّجمّع عالبحر
لا رجل بيه و لا مرَه
عاين اوضاع الجاريه
و الخطر بيها مُحتَمل
الفيروس گالوا منتشر
و العدوى گالوا مذهله
عقّم أياديك ابعجل
لا بعد تحصل مشكله
و لا رِدِت بتگابل شخص
لا اتصافحه و اتقبّله
هذي وقايه امأكّده
و ملزوم تعملها ابعجَل
و افضل وسيله بهالوگت
منها الكرونه تبتعِد
عنّك تظلّ ابمنزلك
و بأهل بيتك تستعِد
خذ لك مؤونه كافيَه
و هالعمل ما حد ينتقِد
فعله و لجل صحّة هلَك
معلوم بتأدّي العمَل
فرصه و جت لك مِن ذهب
تجتمع ويّا العايله
تفرغ عليها عاطفه
و كل فرد منها تسأله
ساعات ما تحصل بعد
عند البعيد امن الملا
تطلب فراغك مِن گبل
و اليوم بالشّدّه حصَل
زوجتك زاد ابها الحِمِل
لازم وضعها تدرسه
الأولاد صاروا بالچبد
عدها بدال المدرسه
إهيَ العمود ابمنزلك
و البيت تدري مأسّسه
والفورمن انت اصبحت
مُشرف و مُصلح كل عطل
بالبيت ساعد حرمتك
حين الطّبخ ويّا الغسِل
جوكم عليها بهالوضع
خفّف عليها مِن الثّگل
سوّي الزّلاطه اعلى الأقل
و افرش السّفره للأكل
و اغسل مواعين الغدا
و لا بعد يدنى لك كسَل
لمبات محترگه انطفت
بدّلها يالله ابهمّتك
واستثمر اوقات التِمُر
لا تضيع كلها بگعدتك
و اقرا كُتب للمنفعه
و مليانه خلها جعبتك
منّ الثقافه والعلِم
تلگى الزّهگ عنّك رحَل
العب مع اولادك لِعِب
و انسى الكرونه والهلَع
و احسبها برّه تنتظر
كل شخص للمجمع طلَع
و اترك اخبار المحزنه
و اللي يجي منها الفزع
و لجل الوقايه الكامله
بيتك صبح أفضل محَل
ووّگت العباده لو إجا
صلّي النّوافل والفرض
و زور الحُسين ابجلستك
نور البريّه بهالأرض
و اسأل الباري برحمته
و بحسين ينزال المرض
لنّه السَّفينه المُنجيه
لَلّي اتوسّل لو سأل
بيتك امحصّن لو رِدِت
اقرا قُرآن و أدعيه
و لو كنِت ناعي هَم بعد
تقرا للعيله تعزيه
و تتوسّل بآلِ النِّبي
و اللي سفنهم منجيه
مِن كل مدينه هالمرض
ينزال و اتشوفه اضمحَل
وصّي أفراد العائله
تدعي الباري و تسأله
و اتگول يا ربّ العرِش
بجاه الغريب ابكربلا
و باب الحوايج هالذي
جنازته ويلي امحمّله
يرحم اعباده برحمته
و يخمد مِن اكرونه الأجَل
اگعِد ابّيتك و امتثل
هذي الوصيّه بكل رضا
بهالرّاي لازم نتّحِد
كلنا و لا حد ينگضه
و اللي يخالف معترض
ملزوم إحنا نرفضه
و لو نگل عدوى بطلعته
محاسب و عذره ما انقبَل
هذي نصيحه الكل أحد
يخدم ابفعله المجتمع
رايد اكرونه تنگلع
و انگول كل همّ انگشع
و انشوف كلّ المملكه
لا وبا بيها ولا جزع
و الوطن كلّه يحتفل
بنيل السّلامه والأمل
