يالّلي اتريد اموظّفه اتعينك على الحال
بالك تطيح ابمشكله و اتروح الامال
لا اتغرّك الحرمه بوظيفه و تملك افلوس
خاف الأمل يفلان تالي يصير منكوس
و المال طبعه لو دريت يغيِّر انفوس
القرآن شاهد و الشّواهد كثره تنگال
الإنسان يطغى لا نظر حاله استغنى
مطُّول منّه امساعده و لا بذِل منّه
عنده البخل منهاج و الإمساك فطنه
مثله فلا اتصاحب سوا حرمه و رجّال
بعض النّسا مِن تشتغل تملك أمرها
و المعنى لو رادت خُلع ردَّت مهرها
تدفر الزّوج اشلون دفره مِن كبرها
و صار الطّلاگ ابهالنّمونه سهِل ينطال
مِد رِجلك ايگولوا على امگايس الحافك
ثوب الطّويل يعرگلك منّه مخافك
و خوفي بعد من تلبسه آخر مطافك
توگع ابِّير المُشكله و تخليصك امحال
و لا مِن خذَيت اموَظّفه لا يروح بالك
تصرف عليك افلوسها و تنعش اعيالك
راتبها ليها و الشّرع بالحكُم جا لك
و ابلا رضاها ما إلك تاخذ و لا اريال
و ان كان يا خويه بطمع داخل عليها
احسب احسابك زين فكره لا تجيها
العِشره إذا لجل الطّمع مَدُّوم فيها
تطلب طلاگ و تِخلَعك مِن دُون إمهال
و ان كان يا خويه عطتك ابطيب خاطر
احمد الباري و دوم اله خلّيك شاكر
بالك تنغّص عيشها و اتصير كاسر
كافيها بالكلمه الجميله و راحة البال
اِحسن النِّيّه يفتح اللَّه اعليك الابواب
جِد و اجتهد كافح يخويه و خذ بالاسباب
لا ترمي كَلّك عالمَرَه و تاليها تنعاب
عالزّوج مكتوب الشّغِل و امصالى الاعمال
لزواج گالوا امشاركه ما بين الاثنين
عالحلوه و المُرّه و لا بيناتهم دَين
كلمن إلى الثاني يگدّم فعله الزّين
و ادُّوم عِشرتهم سعيده بطول الاجال
و انتي يالزّوجه المُؤمنه هالگول گصده
الله جعل ما بينكم رحمه و مودّه
لا اتعزِّي افلوسچ على الزَّوج و يا وِلده
انتي العمَد للبيت لو رحتي بعد مال
عفيه عالزّوجه لا بعد شافت رجِلها
بظروف صعبه و تدري مو بيده يحلها
اتعينه على المصروف و اتحوز ابّذلها
رحمة الباري و المثوبه بخير الافعال
بِذلَت إلى الهادي النّبي كل شي خديجه
و عافت الدّنيا و كل بهارجها البهيجه
زالت اهمومه بالبذِل و ابلا حريجه
مضرب مثَل صارت إلى النّسوه و الاجيال .
