طُلاّب فصلي خفّفِت عنهم معاناة
و خلّيت ليهم الاسئله كلّش سهالات
ما گِلِت ليهم ذاكروا صفحات لكتاب
بس گِلِت هذي الأسئله حسبولها احساب
لكن اشبيدي و الأسف مِنِّي الرّجا خاب
صحّحِت و الگيت البعض خاسف علامات
شِفت البعض خلّى السّؤال ابلا إجابه
و البعض بالصّح و الخطا كل عيد جابه
و گلبي إذا شاف الخطا شبّ التهابه
شرح لدروس اتذكّره و اتجيني حسرات
گتلِك يطالب الاسئله ذاكرها بتجيك
شنهو الجرى لك خبّصِت متگلّي اشبيك ؟!
لكن أعذرَك حيث أُمّك مو حواليك
عهد المنصّه راح و هالسّا اتلوح عثرات
ليكون تستعجل تِريد ابسرعه تطلع
شَيّك إجاباتك عدل و الگولي اسمع
بالك تِخلّي مُهجتي امن الغيض تفگع
آنا أداري اعليك و انت اتجيب هبگات
باگي تِرم واحد و تخلص هالقضيّه
يبني و شوفك ناجح و تاخذ هديّه
و انصلّي عالهادي النّبي خير البريّه
و العترة الأطهار ساداتِ البريّات .
//
